SPRIk abenduaren 31ra arte izango du EAEn WIFI teknologiadun sareak instalatzeko beharrezko ekipamenduak muntatzeko eta eskuratzeko diru-laguntzen programa.

SPRIk berritu egin du 2007an Konekta Zaitez WIFI programa. Programa horren bitartez EAEn WIFI teknologiadun haririk gabeko sareak instalatu ahal izateko antenak eta bestelako ekipamenduak erosteko diru-laguntzak ematen ditu. Jarduera ekonomikoren bat gauzatzen duten pertsona fisiko nahiz juridikoek jaso dezakete laguntza hori. Horretarako honako baldintza hauek bete behar dituzte, besteak beste:

1. Ordenagailu eramangarriak, PDAk eta bestelako tresnen erabiltzaile potentzialentzako sarbide publikoko lekuak izan behar dituzte EAEn, betiere leku horietan itxaro-guneak edo antzekoak baldin badaude, tresna horiekin lan egiteko behar bezala egokituak. Leku horiek honelako zentroetan egon beharko dute kokatuta: Kongresu Jauregietan, Justizia Jauregietan, Liburutegietan, Kultur Etxeetan, Aireportuetan; Tren-, metro- edo autobus-geltokietan, Unibertsitateetan, Merkataritza Ganberetan, Erakustazoketan, Teknologia Parkeetan eta Hoteletan. Horiez gain, Euskadiko Turismo Administrazioaren erregistroan jasota dauden ostalaritza saltokiek ere laguntzak jaso ahal izango dituzte (Jatetxeak, Tabernak edo Kafetegiak).

2. EAEn egon behar dute, edo gutxienez jarduera zentro bat EAEn izan behar dute.

3. Instalazioen erabiltzaileei Internet konexioa errazteko erabili behar dute haririk gabeko WIFI sarea. Laguntza jasotzen duen enpresaren instalazioen erabiltzaileen zerbitzura dauden WIFI instalazioetarako baino ezingo da laguntza jaso. Ildo horretan, ez da diru-laguntzarik emango enpresako langileak konektatzeko.

Era berean, ez da laguntzarik emango Internet sarbidea lortzeko hornitzailean alta emateko gastuetarako, ezta laguntza jasotzen duen haririk gabeko sarearen Internet konexioaren kuotak ordaintzeko ere.

Diru-laguntza, kostuaren %50, Wifi-gunea ezartzeko, eskuratu behar diren antenak eta bestelako tresnak muntatzeko eta erosteko izango da.