Lan-istripu edota lanbide-gaixotasun moduan enpresek Gizarte Segurantzari egin beharreko kotizazioak garatutako jarduerari eta jarduera horren ezbehar-mailari egokituko zaizkie, urtarrilaren 1ean indarrean jarriko duten erreformaren arabera. Egun, kuotak estalitako langileek burutzen duten lanaren araberakoak dira, eta, hori dela medio, enpresa berean kotizazioak desberdinak izan ohi dira, lanpostu bakoitzaren arriskuaren arabera. Araudi berriak soldata gordinaren egungo %2,88ko batez besteko tasa %2,75era jaistea espero dute.

Langile Autonomoen Erregimen Bereziko kotizazioei dagokienez, gutxieneko oinarria, hileko, 801,30 eurokoa da (2006an 785,70 euro), 238,79 euroko kuotarekin (2006an 234,14 euro). Gehienezko oinarria, berriz, 2.996,10 eurokoa da (2006an 2.897,70 euro).

2007ko urtarrilaren 1ean 50 urte edo gehiago dituzten langileek 837,60 eta 1.560,90 euro arteko oinarria aukera dezakete (2006an 809,40 eta 1.509,60 euro). Bada, ordea, salbuespen bat; 45 urte edo gehiagorekin, ezkontidearen heriotzaren ondorioz, negozioaren jabetza hartu behar izan duen eta LAEBn alta hartu duen negozio-jabearen alargunaren kasua, hain zuzen ere. Kasu horretan, oinarrien aukeraketa, hileko, 801,30 eta 1.560,90 euro artean egongo da (lehen 785,70 eta 1.509,60).

Aldiz, 50 urte bete baino lehenago bost urte edota gehiagoz Gizarte Segurantzaren edozer erregimenetan zenbateko handiagoko oinarria kotizatu duten langile autonomoek, 2007an, 2006. urterako eguneratutako oinarria bere horretan mantendu ahal izango dute.