Erreformak karga-tasetan eta kuota-kenkarietan izango du eragina. Hala, tasa orokorra % 32,6tik % 28ra jaitsiko da; enpresa txikien tasa % 30etik % 24ra jaitsiko da, zerga-oinarri osorako; eta % 25eko tasa ordaintzen duten entitateentzat (partzialki salbuetsitakoentzat, mutualitateentzat, etab.) oinarri-zerga % 21era murriztuko da.

Kenkariei dagokionez, berrikuntza garrantzitsuak sartu dira. Hala, ikerkuntza eta garapenari, berrikuntza teknologikoari eta garapen iraunkorrari loturiko jarduerak sustatzea xede dutenak sendotu egin dira. Halaber, indartu dira ingurumenaren kontserbazio eta hobekuntza eta energia-iturrien ustiapen eraginkorragoa bilatzen duten proiektuei loturiko gastu eta inbertsioak sustatzea helburu dutenak.

Bestalde, honako kenkari hauek mantendu egin ditu erreformak: aktibo finko materialetan egindako inbertsioei dagozkienak, ondare kulturalaren sustapen eta zainketara bideraturiko jarduerei lotutakoak, inbertsio produktiboetarako erreserbengatik egindakoak, ingurumenaren kontserbazio eta hobekuntza eta energiaren aurrezpena bilatzen duten jarduerei dagozkienak, gizarte aurreikuspeneko sistemetara egindako ekarpenengatik izaten direnak eta lan munduan sartzeko zailtasunak dituzten gizarte-taldeentzat enplegua sortzeagatik egindakoak.

Desagertu egiten dira informazio eta komunikazio teknologien sustapenerako kenkariak, errenta aldakorreko baloreak eskuratzeko eskaintzen zirenak, esportazioari loturikoak (erregimen iragankorra izango dute 2011 arte) eta lanbide trebatzeari loturiko gastuek zituztenak.