Hainbat zergaren konturako ordainketei dagokien materian eragina izan dute Pertsona Fisikoen Errentaren gaineko Zergari buruzko Foru-Arau berriak eta, finkapen iraunkorrik gabe dihardutela, Biztanle ez diren Pertsonen Errentaren gaineko Zerga erregulatzen duen arauteri estatalak.

Pertsona Fisikoen Errentaren gaineko Zerga alorrean, beren etekin garbia estimazio objektiboaren bidez ("modulukakoak") determinatzen duten zergapekoen jarduera ekonomiko jakin batzuei dagokienez, atxikipena egiteko obligazio berria garatu da, atxikipena %1 izanik. Adierazitako jardueretatik gremioren bat (igeltseroak, arotzak, pintoreak, etab.) eta enpresa-jarduera batzuk ere (merkantzien garraioa, testuen inprimaketa, e.a.) aipa daitezke, ekonomian daukaten presentzia itzela aintzat harturik.

Era berean, 2006 ekitaldian jarduera ekonomikoaren etekina estimazio objektiboari dagozkion zeinu, indize eta moduluen arabera determinatu duten zergapeko zenbaitek aurrerantzean etekin garbi hori zuzeneko estimazio-metodoaren bidez kalkulatu beharko dute.

Atxikipen-tasa berriez eta, zehazkiago, Pertsona Fisikoen Errentaren gaineko Zergaz ari garela, berariaz azpimarratu behar da %18 tasa finkatu dela higigarrien kapitalaren etekinei, ondare-irabazpideei eta higiezinak akuratu eta berrakuratzearen ondoriozko etekinei aplikatzeko; irudia ustiatzeko eskubidea lagatzearen ondoriozkoei, berriz, %24 aplikatuko zaie.

Elkarteen gaineko Zergan, berriz, orokorki %18ko atxikipen-tasa ezarriko da eta aurrean adierazitako kasu horietan, aldiz, %24koa.